Bigmouth - Írskir orðhákar

Vinir og frændur Írarnir á miklum og sögulegum tímamótum. Áttundi maí 07. Blað brotið með heimastjórn stríðandi fylkinga í Belfast. Og ekki vantar Bigmouth í samfélaginu. Frægur Bigmouth og Dyflinardrengur er Bob Geldof sem ég kynntist á námsárunum í Bretlandi. Lærifaðir Bono. Verður fremur minnst fyrir orðháksháttinn og aktívistaþreifingar - Live Aid og Band Aid - en tónlist sína með Boomtown Rats.  En hvað með það. Orð eru til alls fyrst. Og orð eru tónlist.

Svo er það írsk/skoski rithöfundurinn Ian McDonald.  Mitt uppáhald og býr í Belfast. Gleymi aldrei þegar ég eignaðist bók hans River of Gods á Kastrup 2004. Algjör himnasending eftir langt flug frá Peking og ofmettun kapitalískra molla í miðborginni kínversku. Fjallar um næsta bæ, Varanasi Indlands, gömlu Benares, og lífið þar eftir hálfa öld. 

Og nú var þessi frábæri írsk/skoski orðhákur að senda frá sér annað stórvirkið, Brasyl; búin að næla mér í eintak á Amazon og bíð spennt eftir póstinum. 

 Það er ekki spurning, það er komið að því að þýða Ian McDonald á ástkæra ylhýra. Veðja á Brasyl.

Grizzly Man

Það var mynd sem ég sá hér fyrir nokkrum kvöldum og hafði heilmikil áhrif á mig: Grizzly Man er kannski ekki merkilegasta listræna mynd i heimi. En samt, geggjuð, og sönn heimildarmynd um Bandaríkjamanninn Timothy Treadwell og baráttu hans í Alaska fyrir verndun grábjarna þar. Eða þar til hann slitnaði í sundur sjálfur milli siðmenningarinnar og heims hins Villta. Var raunar étinn á endanum af gömlum grábirni.

 Hugtakið rándýr öðlast dýpri merkingu. Að vera villtur. Annar heimur.

Notkun orðsins rándýr þegar við tölum um menn sem rándýr og villimennsku, bæði skylt og óskylt grábjörnunum. Allt svo flókið hjá okkur. Nóg af rándýrunum í nútímasamfélagi. Og gott fyrir sálina að skoða af og til mannlega hegðun út frá rándýrinu. Oft með svigalævi. 

 Enda rán-dýrt þetta líf okkar hér um stundir. 

Sól loks!

Þá eru fyrstu vorverkin í garðinum að baki með Hvítasunnunni. Ekki seinna vænna, úfið grasið kætti lítt. Tréin stór og smá tóku þó ótrúlega vel við sér í rekjunni og vornepjunni. Og nú skín sól!

Eyrarbakki er næstur á dagskrá og tiltekt þar. Gamli höfuðstaðurinn - 101 Íslands eins og Friðrik Erlingsson orðar það - alltaf góður heim að sækja. Upplifa stemningu gamla Íslands; ekki er þó hægt að segja að andi verslunarmenningarinnar svífi yfir Bakkanum. Ein búð á staðnum, fjölnota að vísu, gengur í daglegu tali undir nafninu Sjoppan. 

 Já, hafaldan há og fyrstu vorskipin komin...

 

Djassaður laugardagur - Mood Indigo

Laugardagur í kortunum og djass á fóninum, Björn Thoroddsen et al. Ekki verra að hafa Mood Indigo eða Tea for Two með sér inn í daginn.

Nú eru það vorverkin í garðinum í kulda og trekk eða hvað. Þetta er löng helgi!

Þrátt fyrir copy/paste stjórnarfar, þá er margt gott í kortunum. Nóg af góðum íslenskum djassi; dugar langt í hringiðu daganna og betri þegar á reynir en lúnir pollíönnugallarnir.

Með bros á vör

Nú hefur ný stjórn tekið við á Skerinu. Fögur fyrirheit og almannahagur í öndvegi. En það þarf bæði að byggja grunn og reisa þak þegar staðið er í nýbyggingum. Mér sýnist stjórnin ætla að byrja á þakinu, eða hvað. Jamm og jæja... En kannski henni takist að fá alla nýríku milljarðamæringana til að vinna í grunninum - í sjálfboðinni samfélagsþjónustu!

Já, það vantar margt í grunninn eða vantar kannski alveg grunninn. Hvar á t.d. að fá fólkið til að vinna fagstörfin í velferðarþjónustunni og minnka biðlistana. Á að hækka launin og laða það til starfa; sumir eru farnir úr landi og koma eflaust ekki aftur. Snefill af sjálfsvirðingu; en kannski hugsjónir ráði og ástin á Fróni. Hvað með heimilin, okurvextina og allar fjölskyldurnar sem hafa verið að tapa - og tapa. Og gamla fólkið. Blessuð börnin sem bíða þjónustu. Nei, þetta er sko ekkert djók. 

Auðskipt og stéttskipt samfélag er búið að festa sig í sessi. Ekki lengur eins og að vakna upp af martröð og segja nú er allt í lagi eða fá plástur á meiddið. Nýr samfélagslegur raunveruleiki meðal vor sem aldrei fyrr.

En samt - Jóhanna lifi!Íslenska valkyrjan.

Jæja, ég held ég bregði mér bara í pollíönnugallann og segi bless í bili.